انا بحب الاسئله جداااا اكتر من المكرونه بالبشاميل

( بالمناسبه هما ليه سموه بشاميل ) ؟



لان الاسئله دى هى الدليل الوحيد على ان مخى شغال وان

عقلى بيشتغل ( على اساس ان عندى عقل اصلا )


بس لما حد يسالك شويه اسئله هى فعلا غبيه بس منطقيه

ومتعرفش ترد عليها يبيقي شكلك وحش جدااا

( وخصوصا لو اللى بيسالك اخوك الصغير )

بتلاقي علامات البلاهه ظهرت عليك وهو واقف مستنى

الاجابه وانت مش عارف تتكلم

( فالاخر بقوله ربنا يسهلك و روح اسال ماما )



عايزه اعرف رايكوا بقي فشويه الاسئله الغبيه دى

( بس برده منطقيه )




هى الكهربا لما بتتقطع بتروح فين ؟؟


ليه في شارع مراد حاطين يافطه مكتوب عليها ابتسم انت في الجيزه ....

هى الجيزه دى حاجه تضحك يعنى ؟؟



ليه لما بتطلب ساندويتش من مطعم وتحب تضيف عليه اى

اضافه بيزودوا السعر لكن لما بتحب تشيل منه اى حاجه مش

بيقللوا سعره ؟



ليه بيقولوا الحب اعمى ؟

مع ان كل اغانى الحب عن العيون

نور العين وسحر عنيك وعنيك وحشانى وعينيك كدابين



طب لو كان الحب اعمى ..

اما ليه واجعين دماغنا بالحب من اول نظره ؟؟



لو اسمك ( ماجد ) وطلعت طيار

هتفضل مستحمل قد ايه والناس بتناديلك ( كابتن ماجد ) ؟



الاخرس بيكلم نفسه ازاى ؟؟



ليه بيقولوا على الواحد لما بينام بعمق انه نايم زى البيبيهات ؟؟

مع ان البيبيهات اصلا بيصحوا كل نص ساعه !!



معروف ان اللى
( يتلسع من الشوربه ينفخ فالزبادى )


يعنى انا لو نفخت فالزبادى يبقي ده معناه انى اتلسعت من

الشوربه !!





ليه لو واحد قال قدامى كلمه الاقصر بتيجى فبالى صوره الاثار


مع انه لو قال كلمه اثار مش هتيجى فبالى صوره الاقصر !!!




ليه الناس مبتقولش ( الرياضع فايز و مهزوم ) غير لما تتغلب !!




ليه الشامبو بيبقي بالخوخ الطبيعى مع ان عصير الخوخ


بيبقي بنكهه الخوخ !!



ليه اللى سايق عربيه ومشغل الكاسيت اول ما يتوه او يدخل

شارع ضلمه يروح موطى الصوت !!



ازاى بتعرف المسند بتاعك فالسينما ؟!!


ليه الناس بتقول لاى حد فالشارع يا ( باشمهندس ) ماعدا

المهندس فعلا بيقولوا يا دكتور ؟!!



ليه بيقولوا فالاخبار مصرع 9 في فلسطين

ومصرع 50 في بغداد

ومصرع 57 في زلزال

ومصرع 133 في سقوط طائره

طب ما يقولوا علطول مصرع 249 واحد في نشره اخبار

التاسعه !!




ليه لو الواحد يكون واقف مستنى الاسانسير وخلاص داس

على الزرار وباين انه منور

بيجى واحد تانى ويروح دايس تانى على الزرار!؟؟




ليه لما تيجى تتصل بواحد ..

ليه الارقام الغلط مابتكونش مشغوله ؟؟



طب لو كانت الارض كلاه ( زى ما بيقولوا )

طب الماتش هيبدا امتى ؟؟



ليه هيفا وهبي بتقول
( انا بردانه اح )

مع ان اح دى تتقال للحاجه السخنه

يعنى هى المفروض تقول انا بردانه برررررررررررر




طب لو زى ما بيقولوا الدنيا مسرح كبير


طب انا بمثل ولا بتفرج ؟؟




ليه بيكلبشوا العربيه اللى واقفه صف تانى وقافله الشارع ...

مع ان الشارع بعد الكلبشه بيفضل مقفول برده !!




لو الصاعقه نزلت على حد بيموت متكهرب

طب لما الصاعقه بتضرب البحر

ليه السمك ما بيموتش متكهرب ؟؟




لما الواحد بيعلى صوت الكاست ده بيسحب كهربا اكتر ؟؟




هى الحيوانات بتعطس ؟؟



ليه لما الواحد بيكون جوه عربيه والعربيه داخله نفق ...

تلاقي الواحد يوطى راسه وكانه هو اللى داخل النفق مش

العربيه !!




ليه لما تسال واحد على العنوان وتقوله
( شارع كذا فين )


يقولك هما قالولك فين ؟؟


طب ما هما لو كانوا قاللولى مكنتش هسالك

وبعدين هما مين اللى قالولى ؟؟





ليه ليه لما باحب اوقف حد فالشارع

بنادى عليه بكلمات ملهاش اصل فاللغه اصلا زى

بسست والنبي يا و يا كابتن و باقولك و خد يا و ايوة يا

وليه دايما بتوقف الشخص المطلوب ؟!!




بيقولوا ( لكل قاعده استثناء ) طب ايه استثناء القاعده دى ؟؟




ليه لما حد يحب يقولك معلومه بيبدا كلامك بجمله بيقولك


( بيقولك العربيات غليت ) !!




ليه اللى بيسالك عن الساعه لازم يرفع ايده الشمال ويشاور

على مكان الساعه ؟؟



وليه لازم يحلف ( الساعه كم والنبي ) ؟؟



اللى ميقدرش يتكلم اخرس واللى ميقدرش يشوف اعمى


طب اللى ميقدرش يشم ايه ؟؟



ليه لما تقول لحد حاجه وميسمعهاش تلاقيه هو اللى علا

صوته ؟؟



على الكتابه على التيشرتات لازم تبقي بالانجليش


ليه مفيش كتابه بالعربي ؟؟



لما زيت الذره معمول من الذره وزيت عباد الشمس معمول

من زهره عباد الشمس

طيب ال baby oil
معمول من ايه ؟؟



ليه الواحد بيدوس على الريموت جامد لما الحجاره تخلص ؟؟



لما البوليس بيهجم على شقه و يكسر الباب


مين المسئول يصلح الباب ده ؟؟



لو شفت منظر مؤثر وانت تحت الميه ينغع تعيط ؟؟



الاعمى بيشوف ايه فالحلم ؟؟



هل كان فيه اثار ايام الفراعنه ؟؟



ليه المكرونه الاشكال ( القوواقع والحلزونيه )

بيبقي طعمها احسن من المكرونه العاديه

مع انهم مصنوعين من نفس الخامات؟؟



ليه بيقولوا هديه مجانيه ( هى في هديه بفلوس ) ؟؟



ليه ال happy meal بتبقي قليله !!

مع ان الوجبه المفرحه لازم تبقي مليانه عشان تفرح ؟؟




ليه بنقول ( باى باى ) ومابنقولش ( هاى هاى ) ؟!!




لما الخضار والفاكهه بتساعد على نقص الوزن ...

ليه الفيل ما اسنفادش منها ؟؟



ليه لما الواحد يتكتف بيحس انه عايز يهرش !!؟؟


ليه الاطفال بتسال الاسئله الغبيه دى

وليه احنا مش بنلاقيلها اجابه !!!



ليه يا قلبي كل يوم بتحب واحده ( عمرو دياب )