اتربينا زمان

عالصدق والإخلاص

وفى أى شده نقف بجنب الناس

علمنى ابويا وامى

ماجرحش يوم احساس

فكرت كل القلوب

من دهب أو ماس

اتارى البشر كالمعادن

منها حديد ونحاس

ومنها زى الحجاره

ومنها كالترباس

فى قلوب حنونه وقلوب حقوده

وقلوب شديده وقلوب ودوده

ماهى القلوب انواع

فيه قلب طماع

وقلب خداع

وقلب زى الجحر

صعب تلاقى له قرار

وقلب زى العود

اجوف بدون اوتار

وقلب دايما تشوفه

تايه كده ومحتار

وقلب مغوار وتانى غدار

وقلب من شدة بياضه

بيشع بالانوار

وقلب من شدة سواده

ليله مالهش نهار

دنيا وفيها العجب

واسترها يا ستار