عجبتني القصيدة دي بجد
حبيت تشوفوها
يارب تعجبكم
عسكري مصري بسيط
عسكري مصري بسيط ما فهمش في التخطيط
على معبر رفح محطوط أراقب الأســـلاك
عيني ورا الأسلاك وروحي في غزة هــناك
شايف ضلام دامس ورا كل شيش شـــباك
غزة يا نور عيني ظلمك على عيـــــني
خدي من نور عيني بس البيوت تــــنقاد
عسكري مصري بسيط مافهمش في التخطيط
كل اللي بفهم فيه أنا برضه ليـــــا ولاد
عسكري مصري بسيط بموت في مصروناسها
واوهبها دمي وروحي وفلذة الأكـــــباد
مافهمش آه في سياسة ولا حتى في الحسابات
قالولي خليك واقف وإن الوقوف دا جــهاد
أصل الصهاينة هناك هيهاجموا لما تنـــام
هيفجروا في بلادك ويزرعوا الألغــــام
وشوية جالي اخواتي من غزة قالوا ســلام
وقالولي عدينا بتأشيرة الإســـــــلام
إزاي أقول لاه وأنا لسه فيا حــــــياه
في أي شرع ودين معقول ياناس دا كلام ؟
سامحوني ماتظلمونيش وبلاش تزقوا الباب
بلاش ما تحرجونيش خلوا الغضب بحساب
يا أمي أنا غلبان يا أختي أنا إنســــان
حاسس بطعم العار وبإني شخص جــبان
عسكري مصري بسيط وزيي مصر بسيطة
مصر اللي هيا الناس في الحبس ليها زمان
مصر اللي هيا الحواري والزوايا والشـقا
مش مصر اللي ع الشاشة في نشرة أو أفلام
على نن عين مصر في الضلمة غزة تبات
مصر اللي كانت الحضن في الخوف وفي الأزمات
على نن عين مصر غزة تموت م الجـوع
نهار عيالها بكا وليل حريمها دمــــوع
عسكري مصري بسيط مجبر أكون سجـان
دمعي ورا الخوذة وقلبي فيه بركــــان
يا غزة أنا آسف ياغزة أنا عـــــارف
لا دين ولا عروبة تقبل بدا الخــــذلان
هانت خلاص هانت ريحة الخلاص بانـت
مهما الجراح كانت مهما الهوان كـــان
موعودة من ربنا بالنصر والتمــــكين
صبراً خلاص فجرك ونهاية السجـــان