السلام عليكم
صباحكم \مساكم ميت فله وعشره
وكل عام وانتم بخير بمناسبه انتخابات مجلش الكعب اقصد الشعب
والى الامام يا مصر ف ظل الديموكتاتوريه يووه اقصد الديمواقراطيه
حتى الكيبورد مش عارف ينافق يا جدعاان
المهم ندخل ف الحوار
بما ان الكلام لسه ببلاش ومع الايام
رخص الكلام وقله قيمته
وانا كشاب شغلتى الكلام كان لازم الاقى كلام كبير اوى اقوله
كلام جاامد.كلام يودى ف ستين داهيه
واتفتحت وقولت كلام يودى ورا الشمس
ان حد يعبرنى ، ابدا
يا جماعه كل الى دخلو السجون قبلى من الكتاب قالو كلام اقل من الى قولته
بكتير هو ايه اللى حصل ؟
بقالى سنين بكتب ومفيش ف تاريخى كرجل سلاحه قلمه
لانفى ولا اعتقال ولا حتى سجن
ده عدل بذمتكم
ومع ذلك مش هيأس
هروح ف داهيه يعنى هروح ف داهيه
ونزلنا توبيكات انأح اللى هي سب وقذف رسمى
ونمت وانا بتخيل اوضتى وامن الدوله بيكسر الباب
يلم الكتب ويقطع المرتبه "مش عارف ليه المرتبه بالذات
دايما يدخلوو يقطعوها " بعدين ياخدونى ع الاتارى "البوكس"
بالبيجامه ف نص الليل ويطفو السجاير ف جسمى ويكهربونى
ان حد يعبرنى
ابداااا
ده انا كتبت عن حوارى مع جيمى "جمال مبارك"
واسئلتى ليه واتهامى له بالتوريث
ان حد يعبرنى
ابداااا
*
ف مشهد ف فيلم الارض بيقول
"والشيخ يوسف، ياعينى ع الشيخ يوسف خلاص قعد ف البندر
ونسى كل حاجه .مش كده يا شيخ يوسف"
مش عارف ليه كل اما اشوف المشهد ده احس ان المليجى بيكلمنى
لانى حاسس انى موقفى ف الحياه السياسيه زى موقف يوسف
ويفضل ابو سويلم ينزل بكلامه اللى زى الكرابيج ع الجسم
عمرنا ما ضعفنا
عمرنا ما انكسرنا
عارفين ليه
-علشان كنا رجاله ووقفنا وقفه رجاله-
وانتهى المشهد وانا خجلان من نفسى
يعنى انا احسن م اللى ماشيين ف المظاهرات
وبيتعرضوو للاعتقال والضرب وماخفى كان اعظم
فيين قصص بطولاتى اللى هحكيها لاولادى لما اكبر
هاقولهم ايه ؟؟
هاقولهم ع نضالى وكفاحى زمان ايه لما كنا رجاله وقفنا وقفه رجاله
قررت نى انا بقى هعملها
انزل الشارع والتحم مع الجماهيروامشى ف مظاهرات
سمعت ان الداخليه بتدى تصاريح للمشى ف المظاهرات
قولت يبقى نمشى ميرى ورسمى ونجيب تصريح ونبدأ
رحله كفاحنا السياسى بمظاهره هاديه صامته حضاريه تضيف لتاريخى السياسى بدون ما تقصف عمرى
خصوصا انا مش حمل شومه ع راسى ولا جزمه ع قفايا
تصريحنا ف جيبنا ووخدينه من الحكومه
روحت للظابط المختص-
صباح الخير يا باشا بلهجه كلها ود
انا كنت جاى لسعدتك بس علشات اقدم ع تصريح
قالى: تصريح ايه بالظبط
قولتله:تصريح مظاهره سعادتك
اتعدل ف قعدته وفضل يبوصلى وكانه بيشك ف قواى العقليه
قمت بكل جديه وقلت له :
هى مش مظاهره مظاهره يعنى
تقدر تقول مسيره صامته سعادتك
اخدنى ع اد عقلى وقالى طيب ايه الغرض منها
قولتله يا باشا ولا غرض ولا حاجه
بس عشان لما العيال تكبريعنى وحكايه ووقفنا وقفه رجاله
ابقى الاقى حاجه اقولهالهم
بصلى الظابط حوالى 3 دقايق بصمت وكانه بيستوعب الكلام
الخطيير اللى بقوله وعينه جيبانى من فوق لتحت
وقالى :بتقول عاوز ايه
قلت له :تصريح مظاهره سعادتك
قالى :افهم من كده ان سيادتك عاوز تصريح مظاهره
قولت له :ايوه يا فندم
راح راجع بضهره ع الكرسى وكريزه ضحك مسكته ومبقاش عارف يوقفها
وقال بصوت عالى :ياحسين بيه ياحسين بيه تعالا هنا لحظه
دخل حسين بيه راجل شكله كده مش بيهزر وملامحه جامده وصارمه
وقال ايه الحكايه
رد عليه الظابط وقال:الاستاذ عاوز تصريح مظاهره
بصلى حسين بيه وماسوره ضحك انفجرت هو راخر
وراح قايل للظابط :
ودينك عاوز تصريح ايه --تصريح مظاهره
قعد يخبط بايده ع المكتب وهو مسخسخ من الضحك
وراح قال بصوت عالى :
يـــــا فـــــرج
انا اول لما سمعت فرج افتكرت فيلم الكرنك
طبعا الى شافه عارف فرج طبعا
ايه اللى جاب الكرنك بالوقتى احنا ف الارض
فجأه قام الظابط ماسكنى من لياقه القميص
وقال :انت بتتكلم باسم مين بالظبط..؟؟؟
بتمثل نقابه - جماعه -حزب-جمعيه اهليه مثلا
قولتله:لا يا باشا انا فردانى انا عاوز تصريح ليا لوحدى
عاوز تصريح امشى ف المظاهره عادى يعنى
اصل انا احب امشى قانونى سعادتك
قالى :بس ده قانونا ما بينفعش احنا بنديه للجماعات مش افراد
قولت له :ف ناس كتير هتطلع المظاهرات دى يافندم
قالى :مين الناس دول
قولت له :ناس عاديه من الشعب محترمه ناس ذوق ذوق ذوق
وع ضمنتى كلهم من معهد الصم والبكم ناس محترمه
قالى الظابط : عموما انا هديلك التصريح لانى واثق فيك
وف الناس اللى معاك بس لازم تعرف "جاب الخريطه وفردها"
فيه اماكن ممنوع فيها التظاهر
ميدان التحرير لااا
ميدان رمسيس لاااا
وسط البلد محدش يقرب ناحيته خالص
قولت له : احنا نروح ناحيه فيصل ، الهرم كده يعنى
قالى :لا الهرم ولا فيصل
وكمان مصر الجديده ومدينه نصر
وطبعا المعادى وحلوان ممنوع فيها التظاهر بتاتا
قولت له : طب هنعمل المظاهره فين
راح مشاور ع الخريطه وقال :
ده طريق مصر اسكندريه الصحراوى بعد الماستر بـ30 كم
هتبدأو المظاهره وتدخلو جوه الصحرا مش ع الطريق المتسفلت توقفوه
والمسيره تكون صامته وتبدا 2 الضهر وتنتهى 3
اتفضل التصريح اهوو
ف الوقت المحدد للمظاهره كانت عربيات الامن المركزى ف الكيلو 130 صحراوى مستنيين المظاهره لكن مفيش اثر للمظاهره
فجأه رن تليفونى كلمنى الظابط ع الموبيل :
ايه يابنى فين المظاهره هو لعب عيال ولا ايه
ولا هو ازعاج للسلطات وخلاص
قولت له جايين ياباشا خلاص عدينا الكارته اهو
وصلنا مكان المظاهر وفى عز الحر ف الصحرا
بنعبر عن راينا بحريه كانت الشمس متفقه مع الحكومه باين
ودرجه الحراره 45 والمتظاهرين يقعو واحد ورا التانى
صم وبكم ومافيش مايه والشمس ضاربه ف دماغهم
الغريب ان الاعلام الغربى المغرض
اذاع خبر القتلى والمصابين وكأن الشرطه هى اللى عملت كده
اما اعلامنا الوطنى قال
ان جماعه من المختلين عقليا راحو يتظاهرو ف الصحرا فاصيبو بضربه شمس
وقالوو لى ولادى وانا راقد ع السرير ورابط راسى:
وعملتو كده ليه يا بابا
قولت لهم :عشان كنا رجاله ووقفنا وقفه رجاله
***********************
فجأه :قوم يلا يا مودى قوم يا حبيبى
مين ماما بتصحينى عشان اخد معلقه العسل بتاعه كل يوم
طلع حلم يا جدعااان
