هل هذا يصح.. هل هذا يجوز؟.. اللى تغلب به العب به.. مش مهم غلط كان واللا صح.. لإمتى ح نفضل كده نبلع فى زلط وصوتنا م الكلام انبحّ.. المهم الغاية مادام القانون صاحبى مدام عارف ازاى أطويه.. والعوار أنا برضك فاهمة وراح أعرف ازاى أداريه وازاى أداويه.. وسكوت سمع هس.. السقيفة والهتيفة هما السند هما العمد فى العدد زى الرز.. والهربان م السقعة.. بيدينا وبيدى الوطن ع القفا.. والحق ما دام ضاع ومدام الصدق اختفى والإمام ما دام دلس.. يبقى أكيد فلس.. وغنى يا ويكا.. ودقى يا مزيكا.. الباشا بقى فلاح.. والنبق بقى تفاح.. ولا حد عارف من اللى جه ولا مين اللى راح.. والشعب أهو قدام العيون مدبوح بيقولوا عليه سفاح.. يا عم ريح بقا وارتاح.. سألنا ليه فى المدينة بيكون فلاح.. قالوا عشان القمح وأزمته.. والشعب إيه لازمته.. عشان الكبار يزرعوا ويقلعوا.. ياخدوا الكرسى ويخلعوا.. فى دايرتنا تبقى زفته.. يزرعوا فى المدينة ويا عوف وسكينة.. يا دايرة مسكينة.. وف الميدان تحت الجميزة.. وفوق السطوح ومنين ماتروح حمارته ومعزته ف القلب معزته والطين يسفلته.. والدايرة واحشاه ساكنه ف حشاه.. والخدمة ف دمه المايل عدله والمكسور رممه وسنين فى الدايرة يخدم أهلها المطالب أنا لها.. يديها كسوته وشربه وحتى لقمته.. ومادام القانون قاضى وشيخ البلد راضى.. والذمة مهياش مهم.. نبقى نلفها عمه.. ورشة جريئة وحبة همه يبقى الفلاح بنسر ونجوم.. عشان الحصانة كله يهون.. فى خدمة الشعب لازم نكون.
ياناس خليكو للوطن حراس.. إوعو تبقوا ليهم مداس.. ده انتو الأصل، وانتوا الفصل، وانتوا الراس والكراس.. بإيدكو تبقوا عبيد.. بإيدكو إيديكو ورجليكو من أكبر كبير تنباس.. دورى ولاّ كاس.. باشا اتنشا فوق كتافة فاس.. عارفين ياناس احنا ليه بنخيب.. والعلة ليه مش بتطيب.. عشان الغلط عندنا مش غلط عشان العيب عندنا مش عيب.. عشان اللى بره فى المكان طمعان.. عشان اللى جوه عمره ما بيسيب.. أقولك تعالى نعملنا ندوة.. ولاّ سامر وسهراية ما بقينا فى كفر الهنادوه.. وبنحكى تحت الجميزة جنب الرحايا.. وقبل ما أقول سلام بدى فى كلمة نخدها بجد مالهاش رجعة ملهاش رد صرخة فى حلق كل الخلق.. أيها السادة فى أى موقع كان.. منذ الأزل ولآخر الزمان.. إن نبل الغاية يستلزم نبل الوسيلة وإلاضعنا وضيعنا الأوطان.. وإن كان القانون بيسامح الصالح والطالح الخسران والرابح.. الأخلاق ح تحاسب.. مينفعش مكاسب.. لناجح ولا راسب.. بس بتقولك مكانك اقف حاسب.. لا بتعرف ده مين، ولا بتعرف ده مين ناسب!!