السلام عليكم , وكل عام وانتم بخير
من كتاب (انجلترا هارد لك ) أخترت لكم ( دستور الصياعه ) للشاعر / علاء جنينه
صايع ودنيا الصياعة جنة مفتوحة
لكل فنان يحب الجاية والروحة
( موكلٌ بقضاءِ الله أزرعهُ )
عاشق حياتى ونفسى ليها مفتوحه
صايع أنا !نما سامى بأفكارى
صادق مع نفسى عمرى هو مشوارى
( أهيم فى ملكوتِ الله منطلقاَ )
محبش الغش لا بايع ولا شارى
لكل إنسان نقدم منهج الصايعين
ونعرفه يعنى إيه صايع ويطلع مين
( وهاكَ دستورنا إقرأ فإن به )
منبع رجولة ومصنع للبنى آدمين
تعالى اقعد معانا نعزمك عالشاى
معمول فى إيده سلكه وسندوتشك جاى
( يامن تُقدر حجم الناس بالمالِ )
بكام تبيع نكته حلوه وبكام تقول هأ هاى
أبص للدنيا مدهوش كل يوم بيها
نقطة ندى تهزنى واسهر أناجيها
( أراقب الظلَّ أهوى الشمسَ مشرقةً )
وكل يوم عينى بتشوف شئ جديد فيها
صايع وعندى الصياعة فرسنة وغية
يهزنى الحسن تأسرنى الملاغية
( أبيت ليلى بلا حقدٍ ولا عُقدِ )
كأن دنياى واحدة اتزوقت ليه
صايع بشوف الجمال فى وردة دبلانه
واحس نبض الحنان على قطه بردانه
( ويطربُ القلب صوت الرعد أسمعُه )
واحب غنوة قديمة خالص وعدمانه
صايع وفارس غرام وكلام ورأى صريح
ولسانى رهوان تمللى فى القواله فصيح
( أقول ماشئت فى من شئت ُ مندفعاً )
ميهمنيش مهما قالوا عنى إنى قبيح
أنا أمير الصياعة والبيان والقول
ومبدئى عيش حياتك كل شئ حيزول
( أمسٌ مضى وغدٌ لمّ يأتِ من بعد إذن )
ليه النهارده أعيشه بحالة عرض وطول
درست فن الحياه عن علما عن جهال
عن بياعين عن عوالم عن نسا ورجال
( عن صنعة الله فى كونٍ ولدتُ به )
اسرح واتوه والصياعة صحيح لها أحوال
بياع (بطاطا ) وعايش جنب فرن صفيح
دكتور مدرس محامى مجتهد وفصيح
( فهؤلاء أساتذتى وجامعتى )
أقعد معاهم يورونى الحياة بصحيح
ميهمنيش فيها حتى اللقمة والهدمة
أتعشى حاف واحمد المولى على النعمة
( وكلُ من يجمعُ الأموالَ يكنزُها )
معبروش لو بفردة دايبه من جزمه
صايع وضايع لنا خالد ولا بباقى
أشواقى بتبات ليلاتى فى حضن أوراقى
( وقد أصومُ بلا فرض ولا نُسُكٍ )
وأجود بقوتى كأنى ( حاتم الطائى
آكل رغيفى وانا ماشى وإيه يعنى
ومهما كان الغموس جواه يشبعنى
( وإن رأيتُ سماءَ الحبِ صافيةً )
أدوب ماتوب عن غزاله لو تلوعنى
مايهمنيش إنى ألبس بدله أو قفطان
متغدى رومى سمين أو طول نهارى جعان
( بداخلى منجمٌ بكر أتيه بهِ )
وراسى مرفوعه وفى عز الشتا دفيان
صايع بلاد الله لخلق الله
شايل متاعى فى بقجه منين ما أعوزه ألقاه
( وقد أنامُ بلا فقرٍ ولا ضنكٍ )
فوق النجيل الجميل أرتاح وأقول محلاه
حساس ومرهف وعاشق كل فن أصيل
صندوق ذباله ملقح منكسر وذليل
( أريك فيه جمالاً لستَ تبصرهُ )
ومش ضرورى علشان فن إنه يبقى جميل
عاشق طفولة الصغار شايل حصى فى جيبى
ومعايا صوره فى بطاقتى من ونا بيبى
( تعيدنى ألف عامٍ للوراء لذا )
إن كنت تلقانى عيل يبقى مش عيبى
صايع أنا وبن نكته تعجب السميع
أدى كلامى بيان منظوم بفن بديع
( ولا يذلُ لسانى مرةً أبداً )
وردى حاضر تمللى أى وقت سريع
أمد ايد المحبة لأى شخص غريب
وأود أهلى وصحابى ولىّ ألف حبيب
( أصادق البحر أهوى الليلُ والفجرَ )
حتى نجوم السما لها من ودادى نصيب
دينى ببساطه أساسه إن أنا إنسان
مسلم مسيحى وراضع مية الأحزان
( إذا دعا داعى الهجاءِ لا فرقٌ )
كلمة شهيد وحدها بتوحد الأديان
صايع وضايع وأمرى فى هوايا عجيب
وقلبى حيرته واتلوع بعيد وقريب
( لولا الهوى ياهوى ماكانت الدنيا )
دا اللى بنى مصر كان صايع وكان حبيب
أفدى بلادى واغير من نسمه تلفحها
أو من سحابة تمطر فوقها تجرحها
( أُحبٌ بلدى وبلدى لا يبادلنى )
واقول مسير حبى يوم يصحصحها
عمر الصياعه ماكانت بلطجه وخناق
ولا نطاعه ولطاعه واللى جرب داء
( ولى مبادئٌ فيها لستُ أعلنها )
نهار ما اكتبها تقروا لايحه فى الأخلاق
سألتنى عالصياعه شوف يابلدينا
أهم شئ فيها بعد القصد والنيه
( سألتُ عن جللٍ تفسيره سهلٌ )
كلمة صياعه ببساطه يعنى حريه
تحياتى
منقول من احدى المنتديات
[IMG]
