بعدما فقد عبدو الامل فى الارتباط بالفتاه التى احبها و تمناها ان تكون شريكة عمرة ومستقبلة وطموحاتة القادمة
حينما قال القدر كلمتة قرر ان يتزوج هروبا من الواقع
****فى خلفية المشهد عبدو ماسك اعلان مطلوب عروسة
- إيه رأيك في الإعلان دة يا طارق ؟
- والله يا عبدو ياخويا أنا معرفش عندنا بنات على وش جواز .. يا ريت كان فيه .. كنت جوزتهم للشاب الحليوة دة
- رديت وأنا بنتش الجرنان من إيده :
- لأ يا ذكي .. أنا اللي عامل الإعلان دة.
- بجد؟ .. عامله لمين يعني ؟
- لية أنا .. أنا اللي عايز أتجوز .
معرفش إيه اللي حصل لطارق بعدها .. اتسعت عيناه عن آخرهما .. وتدلى فكه السفلي في نظرة بلهاء .. ولم يستفيق إلا على صياحي :
- إيه يا عم طارق ؟ .. مالك ؟
وفجأة انقلب حاله وأخذ يضحك بطريقة هستيرية :
- هاهاها عايز يتجوز .. هي هي هي عبدو حيتجوز .. هو انتا امور ولا مفتول العضلات وأبيض البشره .. انت باين عليك اتجننت يابني هاهاها ..
رديت بغضب :
- إيه يا عم؟ .. هو أنا بقول حاجة غريبة .. عايز أتجوز يا أخي زي مخاليق ربنا .. على سنة الله ورسوله.
- بس يا عبدو مش تستنى لما تسافر اسكندارية قريب .. وتكون نفسك ؟
-يا بنى افهم أحسن حاجة الجواز بدري .. الواحد يلحق يتمتع في بداية شبابه .. ويعرف يربي عياله
- إيه يابني .. انت حتتجوز على روحك ولا إيه .. وبعدين انت فاكر الجواز بالساهل كدة ؟
- مين دي المُـجن... قصدي مين دي اللي حترضى بيك ؟
- انت مش عارفني يابني ولا إيه ؟ .. دانا عبدو بحاله .. كفاية بس حد يشوفني ولا يشوف السي في بتاعي .. حتلاقي العروض بتنهال علية .. ومش بعيد يجيلي عرض من ريال مدريد اقف حارس مرمى هناك ..
تررن ترررررن
- شفت ؟ أهو الخط الجديد بدأ يرن أهو .. أسيبك أنا بأة وأرد على التليفونات
سابني طارق فى الشغل ومشي وهو بيضرب كف بكف .. وأنا رديت على التليفون
الأولى
- السلام عليكم .
رد صوت ملائكي رقيق :
هاالو .. عبدو توكينج
- أيوة أنا عبدو يا آنسة
- أوكي .. ممكن تقابلني بالليل ؟
- ليه حضرتك؟
- إيه دا .. موش انت اللي عامل الإعلان ؟
- آه .. قصد حضرتك إني آجي أقابل عائلتك الكريمة ؟
- أوف كورس .. ممكن تجيلي الساعة 10 ؟ .. حوصفلك الكوفي شوب ..
- كوفي شوب؟! .. مش حجيلكم البيت يعني ؟
- نو نو .. كدة أحسن بكتير
وبعد ما وصفتلي العنوان سألتني :
- طيب حعرفك إزاي ؟
- حتلاقيني لابس بدلة حمرة .
- حمرة؟! .. أوكي انت بس أول ما تدخل اسأل على اميرة حيدلوك على طول
- طيب حكون هناك 10 بالضبط
- أوك .. تيك كير .. باي.
- مع السلامة.
********************
العاشرة مساءً .. وصلت للكوفي شوب حسب الوصفة .. كان حاجة فخمة أوي .. كأني داخل ديزني لاند .. أضواء متألقة على حمام سباحة جامد أوي .. لدرجة إني اتمنيت آخد غطس فيه على طول ..
- بست .. يا كابتن.
التفت لمصدر الصوت لأجد فتاة جميلة جدا تجلس وسط مجموعة من الشباب .. في البداية ظننت أنهم يصورون فيلما أجنبيا لكنها قالت لي :
- تعالى .. اتفضل هنا.
- أنا ؟
- yes .
- حضرتك أنا كنت جي أسأل على الآنسة اميره.
- أنا اميرة .. انت عبدو؟
- أيوة.
جلست معهم فقالت لي :
ممكن تعرفني بنفسك؟
طلعت الـ CV بتاعي وأعطيتهولها .. قرأته ثم كتمت ضحكها فسألتها :
- طيب ممكن أنا أتعرف بحضرتك ؟
- أنا اميرة .. متخرجة من الـ MCZU وبشتغل AMOM في الـ EICCA
- حصل لنا الشرف يا فندم .
- أوكي .. تحب مدة الجواز تكون قد إيه؟
- أفندم؟! .. قصدك نتجوز إمتى ؟
- نو نو .. قصدي نفضل متجوزين قد إيه ؟
- يظهر إني مش فاهم سؤال حضرتك .. لكن أنا بقول نتعرف أكتر في فترة الخطوبة بس لازم الأول نتفق على شوية حاجات
- حاجات زي إيه ؟
- يعني أولا بالنسبة للبس حضرتك.
- ماله؟
- أنا شايف إن اللبس دة مينفعش إنه يتلبس غير في مكان واحد بس
- أوه نو .. إوعى تكون منهم .. أنا لبسي كويس جدا
التفت إلى أحد الشباب الجالسين وقلتله :
- ما تقول حاجة .. انت مش أخوها برضه ؟
- لأ .. أنا صاحبها.
وصل الجرسون في تلك اللحظة فسألني :
- عايز تشرب إيه ؟
- واحد قهوة مظبوط من فضلك .
- قهوة؟! .. طيب وأنا هاتلي الشيشة بتاعتي.
صحت غاضبا :
- إيه دة؟! .. انتي بتشربي شيشة؟
ثم التفت إلى رجل من الجالسين وقلت له:
- ما تقول حاجة انت مش أبوها؟
- لأ .. أنا صاحب اميرة برضه
فقالت :
- أوه سوري .. نسيت أعرفك بالشلة:
* حمو : صاحبي من الجامعة . * تيمو : صاحبي من الثانوي
* ميسو : جارنا وأعتقد إننا اتجوزنا قبل كدة. * صاصا : ودة لسة متعرفة عليه النهاردة.
- إيه دة ؟ .. انتي مش قلتيلي إني حقابل عيلتك؟
- ما هما دول عيلتي .. وأكتر كمان.
وهنا فاض بي الكيل .. فوقفت وأنا أصيح :
- إيه قلة الحيا دي ؟! .. مفيش احتشام .. وكمان شيشة .. وصحوبية وقلة أدب .. لا يا آنسة أنا مينفعش معايا الكلام دة.
- انت نسيت نفسك ولا إيه ؟ .. انت فاكر نفسك مين ؟ .. انت تطول تتجوزني يا ......
بدأت تنهال علي بألفاظ بعدة لغات أعتقد أنها كانت تمتدح في شخصي ثم قالت :
- تيمو .. ميسو .. ياللا
وهنا قام الأخين تيمو وميسو .. وتقريبا هما كان معاهم الحزام الأسود في المصارعة الحرة .. المهم إنهم والحمد لله قاموا بتحقيق أمنيتي إني أغطس في حمام السباحة الجميل دة
الثانية
طق طق طق
- مين ؟
- أنا ايمن .. افتح يا عبدو
فتحت الباب :
- أهلا .. ايمن ابن خالى .. إزيك وإزي عيالك
- تمام والحمد لله .. انت إيه أخبارك .. مالك وشك مبقع أحمر كدة ؟ .. انت كنت في الاستاد بتتفرج على ماتش الأهلي ؟
- لا دة بس عشان يليق ع البدلة الحمرة
- بدلة حمرة ؟! .. ليه ؟
حكيت لايمن على الموضوع وعلى اللي حصل لي :
- طيب مش كنت تقول لي يا عبدو إنك عايز تتجوز ؟
- خلاص يا ايمن أنا صرفت نظر عن الموضوع .. كفاية اللي جرالي .. أنا رميت الخط الجديد وبطلت تليفونات
- بس أنا متأكد إنك حتغير رأيك لما تقابل نسمة
- نسمة مين ؟
- عروسة لقطة .. فرصة ما تتعوضش .. وأنا حظبطلك معاهم معاد .
********************
أعاد لي كلامه الأمل .. أخذت العنوان ورحت في الموعد .. ما شاء الله فيلا جامدة جدا .. وكان في استقبالي عجوز شمطاء في القرن الثاني من العمر:
- يا أهلا وشهلا .. اتفضل يا عريش .. حشَل لنا البركة.
- شكرا يا حاجة.
- والله يابني انت شكلك طيب وابن حلال .. وأنا بشراحة ارتحتلك من أول نظرة.
- ربنا يكرمك يا حاجة .. ودة شرف لية إني أناشبكم .. قصدي أناسبكم .. وكنت عايز أعرف طلباتكم.
- عيب عليك يا عبدو .. إحنا بنشتري راجل .. إحنا مش حنكلفك حاجة خالش .. عندنا بدل الشقة تلاتة .. وبدل العربية أربعة .. وكل المشاريف علينا كمان.
قشطة .. إيه الحلاوة دي .. أحمدك يا رب .. جوازة لقطة فعلا .. أنا لازم أكافئ الواد ايمن بكيلو سمك مشوي من اللي بيحبه .. فاضل بس إن العروسة تطلع حلوة
- طيب يا حاجة .. إحنا مش حنشوف نسمة ولا إيه ؟
- علِي شوتك يابني لأحشن أنا شمعي تقيل
- كنت بقول عايز أشوف حفيدة حضرتك .. العروسة يعني.
- إيه دة .. انت بتكبرني كدة ليه .. العروشة مش حفيدتي
- آه .. آسف .. تبقى بنت حضرتك ؟
- لا يا حبيبي .. ولا بنتي
ثم مالت نحوي وقالت بنظرة خجولة :
أنا نشمة .. العروشة يا حبة عيني!!
مش عارف إيه اللي خلاني أخدت بعضي وجريت في الشارع زي المجانين .. منك لله يا ايمن .. طبعا مش حيشوف أي سمك مشوي .. لأني ممكن أشويه هو شخصيا .. أول ما روحت كلمته :
- آه يا امين يا واطي .. دة مقلب تعمله فية برضه ؟
- مقلب إيه يا مغفل ؟ انت ما قابلتش نسمة ولا إيه ؟
- قصدك نشمة الله يرحمها
- إيه دة ؟ .. هي ماتت
- لسة شوية .. يا راجل دي ماتستحملش معايا يومين على بعض
- ما هو دة المطلوب يا ذكي .. دي وحيدة وملهاش ورثة وعندها تل أملاك وفلوس .. وأول ما هي تخلص .. تورث انت وتقب على وش الدنيا
- دانت طلعت واطي أوي يا ايمن.. طيب ما اجوزتهاش انت ليه يا عم الناصح
- يا ريتني ما كنتش متجوز .. ما كنتش حتردد لحظة وحدة
أخذتني الشهامة والمروءة وأنا برد بطريقة ممثل قديم مش فاكر اسمه :
- لا يا ايمن .. مش عبدو اللي يتجوز بالطريقة دي
********************
الثالثة
طبعا كنت متضايق جدا من المواقف .. فكلمت انتيمى طارق .. وحكيتله على اللي حصل لي :
- مش قلتلك يا عبدو .. محدش بيتجوز كدة
- أمال أتجوز إزاي يعني ؟
- بص لو انت بأة ناوي بجد .. فأنا عندي عروسة كويسة
- بجد ؟ .. طب الحقني بيها
- طيب مستعد تسافر إمتى ؟
- أسافر ؟ .. ليه؟ .. انت حتجوزني من أوروبا ولا إيه ؟
- لأ .. أنا قصدي تسافر أسوان
- أسوان ؟ .. انت جايبلي عروسة من الصعيد ؟
- أيوة .. بس ناس طيبين أوي
- طيب أنا مستعد للسفر في أقرب وقت
********************
بعد يوم سفر شاق .. وصلت أخيرا بيت الحاج فتحي الجبراوي .. كان بيت كبير وبصراحة استقبلوني بكرم شديد .. زغطوني بما يكفيني لعشرة أيام متواصلة
واتكلمت مع الحاج فتحي وبصراحة كان محترم جدا معايا .. وبدأت أتفاءل من جديد وهو بيشكر لي في العروسة باللغة الصعيدية :
- انت حتاخد فتحية بنتي .. نوارة البيت .. حطها جوة عنيك التنتين
- أكيد يا حاج فتحي .. طيب إحنا مش حنشوف العروسة ولا إيه ؟
عبس وجهه حتى كادت كتلتي الشعر في حاجبه وشاربه يتصلان ببعضهما وهو يَجول :
- وه .. انت عتخرِف ولا إيه ؟ تشوفها كِيف يا وِلد ؟! .. ما عنديناشي حريم تنكشف على راجل واصل
- أيوة يا حاج بس أنا مش راجل هههههههه .. قصدي مش أي راجل يعنى .. دانا العريس اللي جاي أخطبها
- حتى انت .. ما تشوفهاشي غير ليلة دخلتكم
- إزاي بس يا حاج ؟
- هو إكدِه .. وأنا جولت لع يبجى لع .. دي عادات وتجاليد في عيلة الجبراوية من زمان (بتفخيم الميم)
ألا جول لي صحيح .. انت من عيلة إيه ؟
- مش فاهم يا حاج
- يعني اسم جَدك الكَبير إيه ؟
- آه .. أنا من عيلة ابو الغيط فى الشرقية.
فجأة سكتت الأفواه .. وتسمر الكل في مكانه .. وجحظت عيونهم .. وتدلت حواجبهم .. ثم وقف أحد الشباب صائحا:
- جواز عبدو من فتحية باطل
ثم انفتحت جميع أبواب البيت .. ودخل عدد من الإخوة الصعايدة يحملون المشاعل ويتقدمون نحوي وهم يرددون :
- باااااطل .. باااااطل
صحت في حيرة ورعب :
- فيه إيه ؟ .. أنا مش فاهم حاجة
تغيرت لهجة الحاج فتحي وهو يقول :
- دة تار جديم بيناتنا وبين عيلة ابو الغيط .. ياللا يا ردالة .. خلِصوا عليه.
لم أجد خلفي إلا شباكا مفتوحا .. فقفزت بلا تردد .. وكما يحدث في مثل تلك الأفلام وقعت فوق كومة من التبن .. وأعتقد أني حطمت ذلك اليوم الرقم القياسي في الجري
ولم أتوقف إلا عندما ركبت القطار .. وفي القطار كان القرار
عبدو مش حيتجوز يا رجالة
====================
سؤال الحلقة :
من هي أنسب زوجة لعبدو ؟
1- دولي فري
2- نشمة الله يرحمها
3- فتحية التار ولا العار
حينما قال القدر كلمتة قرر ان يتزوج هروبا من الواقع
****فى خلفية المشهد عبدو ماسك اعلان مطلوب عروسة
- إيه رأيك في الإعلان دة يا طارق ؟
- والله يا عبدو ياخويا أنا معرفش عندنا بنات على وش جواز .. يا ريت كان فيه .. كنت جوزتهم للشاب الحليوة دة
- رديت وأنا بنتش الجرنان من إيده :
- لأ يا ذكي .. أنا اللي عامل الإعلان دة.
- بجد؟ .. عامله لمين يعني ؟
- لية أنا .. أنا اللي عايز أتجوز .
معرفش إيه اللي حصل لطارق بعدها .. اتسعت عيناه عن آخرهما .. وتدلى فكه السفلي في نظرة بلهاء .. ولم يستفيق إلا على صياحي :
- إيه يا عم طارق ؟ .. مالك ؟
وفجأة انقلب حاله وأخذ يضحك بطريقة هستيرية :
- هاهاها عايز يتجوز .. هي هي هي عبدو حيتجوز .. هو انتا امور ولا مفتول العضلات وأبيض البشره .. انت باين عليك اتجننت يابني هاهاها ..
رديت بغضب :
- إيه يا عم؟ .. هو أنا بقول حاجة غريبة .. عايز أتجوز يا أخي زي مخاليق ربنا .. على سنة الله ورسوله.
- بس يا عبدو مش تستنى لما تسافر اسكندارية قريب .. وتكون نفسك ؟
-يا بنى افهم أحسن حاجة الجواز بدري .. الواحد يلحق يتمتع في بداية شبابه .. ويعرف يربي عياله
- إيه يابني .. انت حتتجوز على روحك ولا إيه .. وبعدين انت فاكر الجواز بالساهل كدة ؟
- مين دي المُـجن... قصدي مين دي اللي حترضى بيك ؟
- انت مش عارفني يابني ولا إيه ؟ .. دانا عبدو بحاله .. كفاية بس حد يشوفني ولا يشوف السي في بتاعي .. حتلاقي العروض بتنهال علية .. ومش بعيد يجيلي عرض من ريال مدريد اقف حارس مرمى هناك ..
تررن ترررررن
- شفت ؟ أهو الخط الجديد بدأ يرن أهو .. أسيبك أنا بأة وأرد على التليفونات
سابني طارق فى الشغل ومشي وهو بيضرب كف بكف .. وأنا رديت على التليفون
الأولى
- السلام عليكم .
رد صوت ملائكي رقيق :
هاالو .. عبدو توكينج
- أيوة أنا عبدو يا آنسة
- أوكي .. ممكن تقابلني بالليل ؟
- ليه حضرتك؟
- إيه دا .. موش انت اللي عامل الإعلان ؟
- آه .. قصد حضرتك إني آجي أقابل عائلتك الكريمة ؟
- أوف كورس .. ممكن تجيلي الساعة 10 ؟ .. حوصفلك الكوفي شوب ..
- كوفي شوب؟! .. مش حجيلكم البيت يعني ؟
- نو نو .. كدة أحسن بكتير
وبعد ما وصفتلي العنوان سألتني :
- طيب حعرفك إزاي ؟
- حتلاقيني لابس بدلة حمرة .
- حمرة؟! .. أوكي انت بس أول ما تدخل اسأل على اميرة حيدلوك على طول
- طيب حكون هناك 10 بالضبط
- أوك .. تيك كير .. باي.
- مع السلامة.
********************
العاشرة مساءً .. وصلت للكوفي شوب حسب الوصفة .. كان حاجة فخمة أوي .. كأني داخل ديزني لاند .. أضواء متألقة على حمام سباحة جامد أوي .. لدرجة إني اتمنيت آخد غطس فيه على طول ..
- بست .. يا كابتن.
التفت لمصدر الصوت لأجد فتاة جميلة جدا تجلس وسط مجموعة من الشباب .. في البداية ظننت أنهم يصورون فيلما أجنبيا لكنها قالت لي :
- تعالى .. اتفضل هنا.
- أنا ؟
- yes .
- حضرتك أنا كنت جي أسأل على الآنسة اميره.
- أنا اميرة .. انت عبدو؟
- أيوة.
جلست معهم فقالت لي :
ممكن تعرفني بنفسك؟
طلعت الـ CV بتاعي وأعطيتهولها .. قرأته ثم كتمت ضحكها فسألتها :
- طيب ممكن أنا أتعرف بحضرتك ؟
- أنا اميرة .. متخرجة من الـ MCZU وبشتغل AMOM في الـ EICCA
- حصل لنا الشرف يا فندم .
- أوكي .. تحب مدة الجواز تكون قد إيه؟
- أفندم؟! .. قصدك نتجوز إمتى ؟
- نو نو .. قصدي نفضل متجوزين قد إيه ؟
- يظهر إني مش فاهم سؤال حضرتك .. لكن أنا بقول نتعرف أكتر في فترة الخطوبة بس لازم الأول نتفق على شوية حاجات
- حاجات زي إيه ؟
- يعني أولا بالنسبة للبس حضرتك.
- ماله؟
- أنا شايف إن اللبس دة مينفعش إنه يتلبس غير في مكان واحد بس
- أوه نو .. إوعى تكون منهم .. أنا لبسي كويس جدا
التفت إلى أحد الشباب الجالسين وقلتله :
- ما تقول حاجة .. انت مش أخوها برضه ؟
- لأ .. أنا صاحبها.
وصل الجرسون في تلك اللحظة فسألني :
- عايز تشرب إيه ؟
- واحد قهوة مظبوط من فضلك .
- قهوة؟! .. طيب وأنا هاتلي الشيشة بتاعتي.
صحت غاضبا :
- إيه دة؟! .. انتي بتشربي شيشة؟
ثم التفت إلى رجل من الجالسين وقلت له:
- ما تقول حاجة انت مش أبوها؟
- لأ .. أنا صاحب اميرة برضه
فقالت :
- أوه سوري .. نسيت أعرفك بالشلة:
* حمو : صاحبي من الجامعة . * تيمو : صاحبي من الثانوي
* ميسو : جارنا وأعتقد إننا اتجوزنا قبل كدة. * صاصا : ودة لسة متعرفة عليه النهاردة.
- إيه دة ؟ .. انتي مش قلتيلي إني حقابل عيلتك؟
- ما هما دول عيلتي .. وأكتر كمان.
وهنا فاض بي الكيل .. فوقفت وأنا أصيح :
- إيه قلة الحيا دي ؟! .. مفيش احتشام .. وكمان شيشة .. وصحوبية وقلة أدب .. لا يا آنسة أنا مينفعش معايا الكلام دة.
- انت نسيت نفسك ولا إيه ؟ .. انت فاكر نفسك مين ؟ .. انت تطول تتجوزني يا ......
بدأت تنهال علي بألفاظ بعدة لغات أعتقد أنها كانت تمتدح في شخصي ثم قالت :
- تيمو .. ميسو .. ياللا
وهنا قام الأخين تيمو وميسو .. وتقريبا هما كان معاهم الحزام الأسود في المصارعة الحرة .. المهم إنهم والحمد لله قاموا بتحقيق أمنيتي إني أغطس في حمام السباحة الجميل دة
الثانية
طق طق طق
- مين ؟
- أنا ايمن .. افتح يا عبدو
فتحت الباب :
- أهلا .. ايمن ابن خالى .. إزيك وإزي عيالك
- تمام والحمد لله .. انت إيه أخبارك .. مالك وشك مبقع أحمر كدة ؟ .. انت كنت في الاستاد بتتفرج على ماتش الأهلي ؟
- لا دة بس عشان يليق ع البدلة الحمرة
- بدلة حمرة ؟! .. ليه ؟
حكيت لايمن على الموضوع وعلى اللي حصل لي :
- طيب مش كنت تقول لي يا عبدو إنك عايز تتجوز ؟
- خلاص يا ايمن أنا صرفت نظر عن الموضوع .. كفاية اللي جرالي .. أنا رميت الخط الجديد وبطلت تليفونات
- بس أنا متأكد إنك حتغير رأيك لما تقابل نسمة
- نسمة مين ؟
- عروسة لقطة .. فرصة ما تتعوضش .. وأنا حظبطلك معاهم معاد .
********************
أعاد لي كلامه الأمل .. أخذت العنوان ورحت في الموعد .. ما شاء الله فيلا جامدة جدا .. وكان في استقبالي عجوز شمطاء في القرن الثاني من العمر:
- يا أهلا وشهلا .. اتفضل يا عريش .. حشَل لنا البركة.
- شكرا يا حاجة.
- والله يابني انت شكلك طيب وابن حلال .. وأنا بشراحة ارتحتلك من أول نظرة.
- ربنا يكرمك يا حاجة .. ودة شرف لية إني أناشبكم .. قصدي أناسبكم .. وكنت عايز أعرف طلباتكم.
- عيب عليك يا عبدو .. إحنا بنشتري راجل .. إحنا مش حنكلفك حاجة خالش .. عندنا بدل الشقة تلاتة .. وبدل العربية أربعة .. وكل المشاريف علينا كمان.
قشطة .. إيه الحلاوة دي .. أحمدك يا رب .. جوازة لقطة فعلا .. أنا لازم أكافئ الواد ايمن بكيلو سمك مشوي من اللي بيحبه .. فاضل بس إن العروسة تطلع حلوة
- طيب يا حاجة .. إحنا مش حنشوف نسمة ولا إيه ؟
- علِي شوتك يابني لأحشن أنا شمعي تقيل
- كنت بقول عايز أشوف حفيدة حضرتك .. العروسة يعني.
- إيه دة .. انت بتكبرني كدة ليه .. العروشة مش حفيدتي
- آه .. آسف .. تبقى بنت حضرتك ؟
- لا يا حبيبي .. ولا بنتي
ثم مالت نحوي وقالت بنظرة خجولة :
أنا نشمة .. العروشة يا حبة عيني!!
مش عارف إيه اللي خلاني أخدت بعضي وجريت في الشارع زي المجانين .. منك لله يا ايمن .. طبعا مش حيشوف أي سمك مشوي .. لأني ممكن أشويه هو شخصيا .. أول ما روحت كلمته :
- آه يا امين يا واطي .. دة مقلب تعمله فية برضه ؟
- مقلب إيه يا مغفل ؟ انت ما قابلتش نسمة ولا إيه ؟
- قصدك نشمة الله يرحمها
- إيه دة ؟ .. هي ماتت
- لسة شوية .. يا راجل دي ماتستحملش معايا يومين على بعض
- ما هو دة المطلوب يا ذكي .. دي وحيدة وملهاش ورثة وعندها تل أملاك وفلوس .. وأول ما هي تخلص .. تورث انت وتقب على وش الدنيا
- دانت طلعت واطي أوي يا ايمن.. طيب ما اجوزتهاش انت ليه يا عم الناصح
- يا ريتني ما كنتش متجوز .. ما كنتش حتردد لحظة وحدة
أخذتني الشهامة والمروءة وأنا برد بطريقة ممثل قديم مش فاكر اسمه :
- لا يا ايمن .. مش عبدو اللي يتجوز بالطريقة دي
********************
الثالثة
طبعا كنت متضايق جدا من المواقف .. فكلمت انتيمى طارق .. وحكيتله على اللي حصل لي :
- مش قلتلك يا عبدو .. محدش بيتجوز كدة
- أمال أتجوز إزاي يعني ؟
- بص لو انت بأة ناوي بجد .. فأنا عندي عروسة كويسة
- بجد ؟ .. طب الحقني بيها
- طيب مستعد تسافر إمتى ؟
- أسافر ؟ .. ليه؟ .. انت حتجوزني من أوروبا ولا إيه ؟
- لأ .. أنا قصدي تسافر أسوان
- أسوان ؟ .. انت جايبلي عروسة من الصعيد ؟
- أيوة .. بس ناس طيبين أوي
- طيب أنا مستعد للسفر في أقرب وقت
********************
بعد يوم سفر شاق .. وصلت أخيرا بيت الحاج فتحي الجبراوي .. كان بيت كبير وبصراحة استقبلوني بكرم شديد .. زغطوني بما يكفيني لعشرة أيام متواصلة
واتكلمت مع الحاج فتحي وبصراحة كان محترم جدا معايا .. وبدأت أتفاءل من جديد وهو بيشكر لي في العروسة باللغة الصعيدية :
- انت حتاخد فتحية بنتي .. نوارة البيت .. حطها جوة عنيك التنتين
- أكيد يا حاج فتحي .. طيب إحنا مش حنشوف العروسة ولا إيه ؟
عبس وجهه حتى كادت كتلتي الشعر في حاجبه وشاربه يتصلان ببعضهما وهو يَجول :
- وه .. انت عتخرِف ولا إيه ؟ تشوفها كِيف يا وِلد ؟! .. ما عنديناشي حريم تنكشف على راجل واصل
- أيوة يا حاج بس أنا مش راجل هههههههه .. قصدي مش أي راجل يعنى .. دانا العريس اللي جاي أخطبها
- حتى انت .. ما تشوفهاشي غير ليلة دخلتكم
- إزاي بس يا حاج ؟
- هو إكدِه .. وأنا جولت لع يبجى لع .. دي عادات وتجاليد في عيلة الجبراوية من زمان (بتفخيم الميم)
ألا جول لي صحيح .. انت من عيلة إيه ؟
- مش فاهم يا حاج
- يعني اسم جَدك الكَبير إيه ؟
- آه .. أنا من عيلة ابو الغيط فى الشرقية.
فجأة سكتت الأفواه .. وتسمر الكل في مكانه .. وجحظت عيونهم .. وتدلت حواجبهم .. ثم وقف أحد الشباب صائحا:
- جواز عبدو من فتحية باطل
ثم انفتحت جميع أبواب البيت .. ودخل عدد من الإخوة الصعايدة يحملون المشاعل ويتقدمون نحوي وهم يرددون :
- باااااطل .. باااااطل
صحت في حيرة ورعب :
- فيه إيه ؟ .. أنا مش فاهم حاجة
تغيرت لهجة الحاج فتحي وهو يقول :
- دة تار جديم بيناتنا وبين عيلة ابو الغيط .. ياللا يا ردالة .. خلِصوا عليه.
لم أجد خلفي إلا شباكا مفتوحا .. فقفزت بلا تردد .. وكما يحدث في مثل تلك الأفلام وقعت فوق كومة من التبن .. وأعتقد أني حطمت ذلك اليوم الرقم القياسي في الجري
ولم أتوقف إلا عندما ركبت القطار .. وفي القطار كان القرار
عبدو مش حيتجوز يا رجالة
====================
سؤال الحلقة :
من هي أنسب زوجة لعبدو ؟
1- دولي فري
2- نشمة الله يرحمها
3- فتحية التار ولا العار